Азийн хөгжлийн банкны дэмжлэгтэйгээр манай улсад “Олон нийтийн оролцоотой ахмад настны урт хугацааны тусламж үйлчилгээний тогтолцоог бэхжүүлэх” нь туршилтын төслийг 2021-2025 онд хэрэгжүүллээ.
Тус төсөлд Дархан-Уул аймгийн ахмадын хөгжлийн төв, Сэлэнгэ аймгийн Мандал сумын нэгдсэн эмнэлэг, Нийслэлийн СХД-ийн “Ачлалт хүүхдүүд” ТББ хамрагдсан.
Эдгээр гурван байгууллага нь орон нутгийнхаа эрүүл мэнд, нийгмийн халамж, боловсролын үйлчилгээ үзүүлдэг төр, төрийн бус байгууллагын хамтын ажиллагааг хангаж, ахмад настнуудад цогц тусламж үйлчилгээг системтэйгээр үзүүлэх ажлыг хэрэгжүүлсэн байна.
Ахмад настнуудад үйлчилгээ үзүүлэхдээ тэдний бие махбодын үйл ажиллагааны ерөнхий чадвар, эрүүл мэнд, нийгэм-сэтгэлзүй, эдийн засгийн байдлаар эрсдэлийн гурван түвшинд ангилж, түвшин бүрд тохирсон үйлчилгээг санал болгож, эрэлт хэрэгцээнд нийцсэн үйлчилгээнд хамруулжээ.
Туршилтын төсөлд нийт 14 мянга гаруй ахмад хамрагдсан ба тэдгээрээс 3700 гаруйд нь эрсдэлийн үнэлгээ хийж, түүнээс 3-р түвшинд үнэлэгдсэн 400 гаруй хүнд 3-12 сарын хугацаатай кейс менежментийн цогц үйлчилгээ үзүүлсэн байна.
2024 онд Ахмад настны тухай хуульд нэмэлт өөрчлөлт хийж, тус хуулийн хэрэгжилтийг хангахаар
“Ахмад настанд цогц үнэлгээ хийх, үйлчилгээ үзүүлэх журам”
“Ахмад настанд үйлчилгээ үзүүлэх иргэн, ААН, ТББ-ыг сонгон шалгаруулах журам”
“Ахмад настанд цогц тусламж үйлчилгээ үзүүлэхэд мэргэжлийн удирдлагаар хангах журам”
“Ахмад настанд үзүүлэх үйлчилгээний жишиг үнэ, иргэний хариуцах төлбөрийн хэмжээ журам”-ыг боловсруулжээ.
